Муус устар 8 күнүгэр үһүс сылын ыытыллар улуустааҕы «Сааскы сардаҥа - 2017” көрүү күрэх буолан ааста. Барыта биэс нэһилиэк кытынна: Тойбохой, Кутана, Аллыҥа, Бордоҥ, Илимниир. 11чаастан күрэхпит саҕаламмыта. Биһиги оскуола бастакы ньүөмэринэн кыттыбыппыт.

Күрэхпит маннык түһүмэхтэринэн барбыта:

1. Тойук

2. Норуот ырыата

3. Тыыннаах доҕуһуолунан үҥкүү

4. Чабырҕах

5. Сахалыы үҥкүү

6. Олоҥхо

7. Аман өс

8. Оһуохай.

Кутаналар уонна Бордоҥнор күүскэ дьарыктанан, бэлэмнэнэн кэлбиттэрэ тута көстөр. Биһиги даҕаны бэркэ кытынныбыт диэн этиэххэ сөп. Биһиги таҥаспытын, атахпыт таҥаһын, оһуохайбытын, чабырҕахпытын хайҕаабыттара. Күрэх бүтүүтэ дьүүллүүр сүбэ түмүгү таһаарыар диэри куораттан кэлбит филологическай билим доктора, ХИФУ профессора, РФ үрдүк үөрэхтээһин бочуоттаах үлэһитэ Людмила Степановна Ефимова маастар кылаас ыыппыта, онно кыра минустары эппитэ: оһуохайга атахтарын хамсаныытын көннөрөн биэрбитэ, чабырҕаҕы билигин аһары хамсаныынан киэргэтэр буоллулар, ону аҕыйатар курдук үөрэтин диэбитэ, биһиги чабырҕахпыт түҥ былыргы чабырҕах буолбатах үһү, аныгы олох чабырҕаҕыгар киирсэр үһү, ол курдук нэһилиэктэргэ барыларыгар биирдиилээн этитэлээтэ. Ол кэннэ түмүкпүтүн билиһиннэрдилэр, гала кэнсиэргэ үчүгэй ньүөмэрдэри сүүмэрдээтилэр, ол курдук биһигиттэн тыыннаах доҕуһуолунан үҥкүү, чабырҕах, оһуохай киирдилэр. Онтон кэнсиэр кэннэ кыайыылаахтары наҕараадалааһын саҕаланна. Ол курдук, бастакы миэстэни Бордоҥ, биһигиттэн Сидоров Юлиан, Сидорова Даяна «Бастыҥ оһуохай”, Алексеева Инна “Бастыҥ олоҥхо” уонна уопсай түмүгүнэн Аллыҥа оскуолата 2 степеннээх лауреат үрдүк ааты ылан үөрэн – көтөн дьиэбитигэр тарҕаспыппыт.

Эһиилги күрэххэ быйыл кыттыбатах оскуола кыттыбат, ол иһин биэс эрэ оскуола  күөн күрэх көрсөр. Уопсай, сылларынан ылан көрдөххө, Кутана, Бордоҥ оскуолата иниики иһэр, биһиги үһүс иһэбит, эһиил өссө күүскэ эрчиллэн оскуолабыт чиэһин көмүскүөххэйин диэн сыал туруорунан дьарыктаныахха наада.

 “Ырыа алыптаах эйгэтэ” куруһуок салайааччыта: Амонова М.В.